KCK: Êrişên tepisandin û qirkirina Kurdan wê ti carî bê bersiv nemînin!

Hevserokatiya Konseya Rêveber a KCK’ê, li ser êrişên nijadperestî yên li dijî Kurdan daxuyanî da ku dema dawî zêde bûne.

Di daxuyaniya KCK’ê de hate gotin, “Bila rehma Xwedê li Hakîm Dal be ku di êrişên rojên dawî de yên li Tirkiyeyê şehîd bû û şîfa xêrê ji birîndaran re dixwazin. Ji salên 1990’î û vir ve ku têkoşîna azadiyê ya gelê Kurd bi pêş ket û li Kurdistan û Tirkiyeyê serhildan zêde bûn, li bajar û navçeyên Tirkiyeyê êriş li dijî Kurdan têne kirin. Bi sedan bûyerên bi vî rengî hene ku gelek ji wan bi rengê lînçkirinê hatin kirin. Êrişên ku dibin sedema birîndarî û kuştina mirovan, demên dawî zêde bûne. Berî cejnê û bi cejnê re bûyerên wiha ji nişka ve zêde bûn ku ev yek nîşan dide, bi rengekî organîzeyî têne kirin. Êrişên ku bi qetilkirina Denîz Poyraz li avahiya HDP’ê ya Îzmîrê dest pê kir, bi birîndarkirin û kuştina mirovan dewam dikin. Beriya çend rojan li Afyonê êriş birin ser malbatên Kurdan û xwestin ku jin-mêrên Kurd lînç bikin. Di vê êrişê de êşkence li mirovan hate kirin û hinek ji wan birîndar bûn. Beriya cejnê li navenda Enqereyê careke din êriş birin ser Kurdan û gelek Kurd birîndar kirin ku rewşa du ji wan giran e. Li gundekî Konyayê di êrişê de Hakîm Dal ji aliyê bi dehan êrişkarên faşîst ve li pêş çavên xizmên xwe hate qetilkirin. Beriya demeke kurt li Konyayê careke din êriş birin ser malbateke Kurd û hin ji wan bi giranî birîndar bûn.”

ÊRIŞ JI BER WÊ YEKÊ TÊ KIRIN KU GELÊ KURD DI AZADIYÊ DE ISRAR DIKE

Daxuyaniya Hevserokatiya Konseya Rêveber a KCK’ê wiha dewam kir:

“Êrişên li dijî Kurdan ên li bajar û navçeyên Tirkiyeyê pêwendiya xwe bi polîtîkayên desthilatdariya faşîst a AKP-MHP’ê re heye. Kurdên ku Kurdîtiyê diparêzin û daxwaza azadiyê dikin, weke dijmin hatine îlankirin. HDP a ku çareseriya demokratîk a pirsgirêka Kurd diparêze, weke dijmin hatiye îlankirin û timî kirine hedef. Gelek caran gef li wan Kurdan hate xwarin ku deng dane HDP’ê, gef li hêzên demokrasiyê û gelên Tirkiyeyê hatiye xwarin. Ji xwe tê zanîn, dijminatiya li PKK û Rêbertî ku nêzî nîv sedsal e ji bo azadiya gelê Kurd têdikoşin, dijminatiya li Kurdan e. Rêber Apo ji ber ku hişmendiya azadiyê daye gelê Kurd, di nava zext û tecrîdeke giran de tê hiştin.

Êriş ji ber wê yekê tên kirin ku gelê Kurd di azadiyê de israr dikin. Li gel zext û êrişan jî gelê Kurd di têkoşîna azadî û demokrasiyê de bi biryar e. Ji ber vê israra Kurdan a di azadî û demokrasiyê de êriş têne kirin. Di şexsê malbatan û şexsan de êrişî tevahiya gelê Kurd dikin. Bi rêya van êrişan hewl didin ku îradeya jiyana demokratîk û azad a gelê Kurd bişikînin. Welê dikin ku Kurdek êdî nebêje ‘Ez Kurd im’, bi Kurdî neaxivin û bi nasnameya xwe ya Kurdîtiyê nejî! Ji ber ku dixwazin Kurdan qir bikin, bi êrişên tepisandinê dixwazin înkarê di destpêkê de di nava Kurdan de bidin kirin. Lewma êrişên li dijî Kurdan plankirî û organîzeyî ne.

ÊRIŞ JI ALIYÊ TIFAQA AKP-MHP’Ê VE TÊN KIRIN

Desthilatdariya AKP-MHP’ê kengî gefê li Kurdan, li HDP’ê û li hêzên demokrasiyê dixwe, hinek radibin vê yekê ji bo xwe weke talîmatê dibîne û dest bi êrişê dike. Navendeke şerê taybet heye ku planên tepisandinê li ser Kurdan amade dike, bi rêxistin dike û fermana wê dide. MÎT û MHP ew hêz in ku van plansaziyên şerê taybet bi cih tînin. Ji ber vê yekê piraniya kesên ku êrişê dibin ser Kurdan têkiliya xwe bi MHP’ê re hene. Ji ber vê yekê êrişên li her cihî niha li dijî Kurdan têne kirin, li ser bingeha dijminatiya li Kurdan ji aliyê tifaqa AKP-MHP’ê ve têne kirin. Tayyîp Erdogan ji gelê Kurd û hêzên muxalîf re got, ‘ev ji bo we hîn demeke xweş e’ û fermana êrişan dide. Ji xwe bi gotina ‘Kurd xwecihî û milî nînin’ kirine hedefa her cûre êrişan.

BI ÊRÎŞAN RE DIXWAZIN GELÊ KURD Û GELÊN TIRKIYEYÊ NIKARIBIN WERIN BA HEV

Armanca van êrişan ev e ku di salên dawîn de gelê Kurd ji bo têkoşîna hevpar bi gelên Tirkiyeyê û hêzên demokrasiyê nikaribin werin ba hev. Qetlîamên di sala 2015’an de yên li Sirûc û Gara Enqereyê jî ji bo pêşîlêgirtina yekîtiya demokratîk a gelan bû. Ji ber ku li gorî mêtingeriya qirker gelê Kurd û gelên Tirkiyeyê di têkoşîna demokratîkbûnê de werin ba hev, wê ev tişt dawiya mêtingeriyê bîne. Bi vî awayî dixwazin pêşiya pêkhatina vê yekîtiyê bigirin, him hêzên demokrasiyê û him jî Kurdan qels bikin. Bi vî awayî li gorî hesabê xwe dixwazin qirkirina Kurdan bi hêsanî bikin. Heke qirkeriya mêtinger bi van êrişan re naxwaze gelê Kurd û gelên Tirkiyeyê werin ba hev, hêzên demokrasiyê yên Tirkiyeyê jî divê hevgirtin û îradeya têkoşîna hevpar a bi Kurdan re xurt bikin, di vê têkoşînê de ya li dijî faşîzmê jî bi Kurdan re bin.

Gelê Kurd divê baş bizanibe ku armanca van êrişan ji bo qirkirinê ye. Ev êriş bi plankirî ne û wê ji niha şûnde jî pêk were. Bi polîtîkaya şerê taybet Kurdistan tê valakirin, Kurd diçin ku derê jî li ser wan êriş tê kirin. Yek ji armanca êrişa li Konyayê jî ev e ku Kurdên li Anadolûya Navîn ji axa wan derxînin. Ev hemû tişt ji bo qirkirinê pêk tê. 

GELÊ KURD DIVÊ STÛYÊ XWE XWAR NEKE Û XWE BIPARÊZE

Heke gelê Kurd dixwazin hebin, wekî hemû zindiyan divê li hemberî êrişan, xwe biparêzin. Ev parastin di şexsê wan de parastina hebûna gelê Kurd e. Wêrektiya Kurdan dikare her cure êrişan bişkîne. Di vî warî de divê stûyê xwe xwar nekin. Em dixwazin tevî gelên Tirkiyeyê li her derê bi biratî bijîn. Em dijminatiya tu gelî nakin. Dema ku êrişî me hate kirin, em jî bersiva wan bidin. Ji bo vê jî divê em li her derê xwerêxistinkirina xwe geş bikin. Xwerêxistinkirin hêza herî mezin a parastinê ye. Li her navçe û bajarên Tirkiyeyê bi xwerêxistinkirin û berxwedana li hemberî êrişan dikare pêk were. Bêguman Kurd divê têkoşîna li hemberî faşîstên şovenîst, tevî hêzên demokrasiyê helwestên hevpar pêk bîne. 

Wê êrişên ji bo qirkirina Kurdan tu carî bêbersiv nemîne, kesên ev êriş rêxistin kirine û kirine wê teqez hesabê vî tiştî bidin. Em bang li gelê Kurd dikin ku di rewşên wisa de bila hevgirtinê xurt bikin, ji bo bidawîanîna van êrişan têkoşîna azadî û demokrasiyê li her derê geş bikin.”


Source link

About Hooshyar

Check Also

Cenazeyê şervana YPJ’ê Esma Ehmed li Minbicê hat veşartin

Şervana YPJ’ê Şehîd Esma Ehmed (Rîtac) li Şehîdgeha Minbicê hat veşartin. Şêniyên Minbicê cenazeya şehîd …

Leave a Reply

Your email address will not be published. Required fields are marked *