نێچیرڤان بارزانی لە بەغدادەو: وەخت چارەسەرکردن کێشەیله‌ ‌ وەیەکجاری

شەفەق نیوز/ سەرۆکایەتی هەرێم کوردستان، ئمڕو یەکشەممە، بەیاننامەیگ ورد درکرد، لە چەوپیکەفتنەگان نێچیرڤان بارزانی سەرۆک هەرێم وەل سێ سەرۆکاتیەگە و وەرپرسە عراقیەگان لە بەغداد پایتەخت.
بەیاننامەیگ ک رەسیە ئاژانس شەفەق نیوز؛ دووپاتکردن بارزانی هاورد ک ئەو وەختە هات ئەرا رەسینەوەیگ هاوبەش و یەکلاکردن گشت باوەتەگان.
بەیاننامەی سەرۆکایەتیەگە هەمیش وت: نێچیرڤان بارزانی لە گفتوگۆەیلی وەگەرد سێ سەرۆکایەتیەگە و وەرپرس و لایەنە عراقیەگان، کێشەو وەرپرسایەتیەگان وە هاوبەشی دانا ئەرا گشت عراقیەگان، وتیش؛ چارەنووس گشتمان یەک چارەنووسە، و گرفتەیل عراق وهەرێم کوردستان گرفت گشت عراقیەگانە.
بارزانی دووپاتکرد؛ دویای ئەزمونەیل تاڵ لە ساڵەیل ناکۆکی و کێشەیل ناوبەین هەردوگلا، بایەسە نەچیمنەو ئەرا رابردوو، بەڵکم ئەو وەختە هات تا بڕەسیمنە فامستن هاوبەش، وچارەسەر کێشەگان وە شیوەیگ یەکجاری بکەیمن، لە ری رێککەفتن گشتگیریگ، و رازیکەر هەردوگلا، و دابین ئارامی ویەکسانی و پێشکەفتن ئیسەو وئاینده‌ی عراق بکەێد.
سەرۆک هەرێم کوردستان باس رەوش و سەختیەگان کرد، و وت: تویه‌نیمن قەیرانەگان بکەێمنە دەرفەت و هاوکاری وکار هاوبەشانە، لەوەرانوەر سەختیەگان وقەیرانه‌یل ئیسە لە وڵاتەگە، ک خوەی وەرپرسایەتی هاوبەش و گشتیە.
ودیاری کرد؛ وەردوامی گرفتەگان لە بەرژەوەنی هویچ لایەنیگ نیە، و وەل یەکەو تویەنیمن لە ری هاوکاری، بچیمنە رەسینەوەیگ هاوبەش ئەرا وەڕیەوبردنیگ خاستر ئەرا وڵاتەگە، ئەرا خزمەتکردن گشت هاوولاتیەیل.
بارزانی هەمیش دووپاتکرد لەبان ئامادەیی هەرێم کوردستان ئەرا چارەسەرکردن گشت گرفتەیل وباوەتە دویا خریاگەیل وەگەرد حکومەت فیدڕاڵی، لەبان بنەمای دەستور و چەودێری سیستم فیدڕاڵی، و مافەیل وئەرکەیل و گرنگیەیل ئیسە ئەرا ژیان هاووڵاتیەیل، وباس دەور وەرپرسەیل و لایەنە سیاسیه‌ عراقیەگان كرد لە پشتگیری گفتوگۆ و چارەسەری و رەسین ئەرا رێککەفتن گرنگە ك ئەرکە لەبان گشت.
لەلای خوەیان، وەرپرسەیل و لایەنە سیاسیه‌ عراقیەگان باس سەردان بارزانی کردن لەی مەوقە ولەسای ئی رەوشەیلە وەگورەی بەیاننامەگە ک پەیام ئیجابیە و گام خاسیگە ئەرا هەرێم کوردستان وەرەو بەغداد، ونیشانەی نیاز پاکیە ئەرا چارەسەرکردن گرفتەیل، وباس لە دڵئارامیان کردن ئەرا ئامادەیی هەرێم کوردستان ئەرا گفتوگۆ و چارەسەرکردن یەکجاری گرفتەیل و رەسین وه‌ رێککەفتن وەل حکومەت فیدڕاڵی.
بەیاننامەگە هەمیش وت: بارزانی لە روژ یەکەم لە سەردانەگەی ئەرا بەغداد وە یاوه‌ری دوو جێگرەیلی، چەوی کەفتە سەرۆک وەزیران و سەرۆک کۆمار و سەرۆک ئەنجومەن نوێنەران، ونوێنەر نەتەوە یەکگرتوەگان لە عراق، وروژ یەکشەممە چەویکەفتە عەمار حەکیم وەرپرس جمشت حیکمە، وهادی عامری وەرپرس هاوپەیمانی فەتح، و نوری مالکی وەرپرس هاوپەیمانی دەوڵەت یاسا، وکومسیۆن سیاسی جمشت سەدر.
لە ئەو کۆبونەوەیلە باس کریا لە پەیوەندیەگان ناوبەین هەرێم کوردستان و حکومەت فیدڕاڵی عراق، و هه‌وڵ وگفتوگووه‌یل ئەرا چارەسەرکردن کێشەیل ناوبەینیان، ورەوشەیل ئیسەی وڵاتەگە، ودەسەوکاربوین حکومەتە نووەگە لە ئەرکەیلی، وقەیرانە داراییەگە و هووکارەیل پەتای کۆڕۆنا، وەل مەترسیەگان تیرۆریزم و فرەوەبوین جوولەو پەلامارەیل داعش لە عراق.
وهەمیش دووپاتکریا لە گرنگی هاوکاری وهەماهەنگی ناوبەین پێشمەرگە و سوپای عراق، و وەردەوامی پشتگیری هاوپەیمان ناودەوڵەتی دژوە داعش، ودەور نەتەوە یەکگرتوەگان لە عراق، ومقەیەتی سەروەری و سنور وڵاتەگە و ئەوزەڵکردن پەیوەندیەگان وەل دەوڵەتەیل هاوسا و ناوچەگە وجهان لە بان بنەمای رێزگردن وەرانوەری و بەرژەوەنیەیل هاوبەش.


Source link

About Hooshyar

Check Also

Hejmara Pêketîyên Vîrusa Korona 63 Mîlyon Derbaz Kir

Hejmara pêketîyên vîrusa korona 63 mîlyon derbaz kir. Li gor agahîyên dawî yên Zanîngeha Johns …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *