ئەپڵ iPhone SE ـی نوێی بە پڕۆسێسەری A13 Bionic و نرخی دەستپێکی 399$ ـەوە ڕاگەیاند

ئەپڵ
15, نیسان 2020

کەمێک بەر لە ئێستا، ئەپڵ کۆتایی بە دەنگۆ و پڕوپاگەندە درێژخایەنەکان هێنا و سەرئەنجام iPhone SE ـی نوێی بە پڕۆسێسەری A13 Bionic و نرخی دەستپێکی 399$ ـەوە ڕاگەیاند.

دیزاینی iPhone SE لە پشتەوە و پێشەوە، هاوشێوەی iPhone 8 ـی ساڵی 2017 ـە، تەنها ئەوە نەبێت کە لۆگۆی ئەپڵ لە سەرەوە هاوشێوەی iPhone 11 هێندراوەتەوە ناوەڕاست و نووسینی iPhone ـیش لە خوارەوە لابراوە. خاوەن ڕوونمایەکی بچکۆلانەیە بە قەبارەی 4.7 ئینج لە جۆری IPS LCD Retina بە هەبوونی تایبەتمەندی True Tone و لە پێشەوە خاوەن دوگمەی فیزیایی گەڕانەوەی ناسراو بە (هۆم) ـە و هەستەوەری پەنجەمۆری لەسەر جێگیرکراوە.

بێگومان لە تایبەتمەندییەکاندا لە iPhone 8 ناچێت. بە پڕۆسێسەری Apple A13 Bionic ـی سەر iPhone 11 ـەکانی پار ساڵ بەهێز کراوە و خاوەن بیرگەی ناوەکی 64 و 128 و 256 گێگابایتییە.

مۆبایلی iPhone SE لە پشتەوە خاوەن کامێرایەکە بە ڕوونی 12 مێگاپێکسڵ، کە پشتگیری لە تایبەتمەندییەکانی HDR و Portrait Mode دەکات و توانای تۆمارکردنی ڤیدیۆی هەیە بە ڕوونی 4K. لە پێشەوەش خاوەن کامێرایەکە بە ڕوونی 7 مێگاپێکسڵ. ئەمە نموونەی وێنەیەکی چرکێندراوە بە مۆبایلەکە:

مۆبایلەکانی iPhone 11 و iPhone 11 Pro ـی پار ساڵ یەکەم مۆبایلی ئەپڵ بوون کە پشتگیری لە Wi‑Fi 6 بکەن، iPhone SE ـی نوێش پشتگیری لە تەکنەلۆژیای 802.11ax Wi‑Fi 6 دەکات. هەروەها پشتگیری لە تایبەتمەندی “Express Cards with power reserve” دەکات بۆ بەکارهێنانی ئایفۆن وەکو کارت.

ئایفۆنە نوێیەکە خاوەن 2 شوێنی سیمکارتە، هەروەها کێشی 148 گرامە و پانیشی 7.3 میلیمەترە. خاوەن بڕوانامەی IP67 ـە بۆ بەرگری لە بەرانبەر تۆز و ئاو.

بە هەرحاڵ، ئایفۆنە نوێیەکە خاوەن چیپی Ultra Wideband نییە، کە چیپەکە وا دەکات پەیوەندی مۆبایلەکە لەگەڵ ئامێرەکانی چواردەوری باشتر بکات.

نرخی ئایفۆنە نوێیەکە لە 399$ دەستپێدەکات و بە ڕەنگەکانی ڕەش و سپی سوورەوە بەردەست دەکرێت. لە ئەمڕۆوە بەردەست دەبێت بۆ کڕین بە شێوەی داواکاری پێشوەختە و لە 24 ـی ئەم مانگەشدا ڕەوانەی کڕیارە پێشوەختەکان دەکرێت و لە کۆگا فەرمییەکانی ئەپڵ بەردەست دەکرێت بۆ کڕین.

About ماکوان بەرزان

Check Also

سوود وەر بگرن لە سکان کردنی بەڵگەنامەکان لە ڕێگەی ئایفۆنەوە بە شێوەی کۆنتڕۆڵ کراو لە لایەن ماکەکانەوە

ئەپڵ 1, ئازار 2021     ئەپی Notes لە ئایفۆنەکان بە شێوەیەکی زۆر باش گونجێندراوە …

Leave a Reply

Your email address will not be published. Required fields are marked *