ئاينده‌ێ كوردستان‌ وعێراق وه‌ره‌و كوو؟

له‌شوون ئه‌وه‌گ له‌سه‌رده‌م ده‌سه‌ڵات (نوری مالكی) سه‌رۆك وه‌زیره‌یل وه‌رين عێراق, دژایه‌تیكردن كورد له‌لایه‌ن په‌رله‌مانتاره‌یل نزیك له‌مالكی بويه‌ به‌رنامه‌ێ كاریان, وه‌لێ ‌ئيسه‌ وه‌خاتر پرۆژه‌یاساێگ كۆنگرێس ئه‌مریكا‌, دوواره‌ دژایه‌تیكردن كورد له‌لایه‌ن په‌رله‌مانتاره‌یل شیعه‌وه‌ ده‌سوه‌پێكردگه‌سه‌و‌.

(ئبتیسام هلالی) ئه‌ندام لیژنه‌ێ یاسایی له‌ئه‌نجومه‌ن نوێنه‌ره‌یل عێراق, هاووه‌خت یه‌كێگیشه‌ له‌په‌رله‌مانتاره‌يل عه‌ره‌ب شیعه‌, ڕه‌خنه‌ی ئه‌وه‌ له‌هه‌رێم كوردستان گرتگه‌ ك‌ وه‌بێ پرس به‌غدا, چه‌ك له‌ئه‌مریكا وه‌رگردنه‌.

هلالی وه‌ماڵپه‌ڕ (غه‌د پرێس) عه‌ره‌بی وتگه‌‌, كورد وه‌بێ ڕه‌زامه‌ندی به‌غدا چه‌ك وه‌رگردگه‌, ئه‌گه‌ر باێد‌و ئه‌مریكايش مكۆڕ بوود له‌بان یاساێ پڕچه‌ككردن سوننه‌‌و كورد, ئه‌و وه‌خته‌ عێراق وه‌تۆمه‌ت شكانن سه‌روه‌ری خاكه‌گه‌ێ, ئه‌مریكا ده‌ێده‌ دادگاێ ناوده‌وڵه‌تی.

ئاشكرايشیه‌وكردگه‌, عێراق وه‌نويسرياگێگ فه‌رمی ك‌ ئه‌ڕا حكومه‌ت ئه‌مریكا كلێ كردگه‌ ‌‌و ڕه‌دێكردگه‌سه‌و‌, مامه‌ڵه‌ وه‌یاساگه‌ێ كۆنگرێس ئه‌مریكا بكا.

ئه‌گه‌ر باێد و دژایه‌تیكردن عه‌ره‌ب شیعه‌ له‌باره‌ێ یاساگه‌ێ كۆنگرێس ئه‌و وڵاته‌‌ وه‌رده‌وام بوود, دوير نییه‌ ئه‌مریكا هویر له‌بڕین هاوكارییه‌يل سه‌ربازیی ئه‌ڕا عێراق بكاده‌و ‌‌و ئه‌و وڵاتيشه, له‌لێوار دووزه‌خ بيلێده ‌جێ.

چه‌ودێره‌يل لێوا دويننه‌ێ، جێوه‌جێكردن ئه‌و یاسا‌ له‌بان ئه‌رز واقع, كاریگه‌ری گه‌وراێگ له‌بان پێگه‌ێ كورد دێرێ, چوينكه‌ هه‌م له‌ڕوی سیاسییه‌و‌ ئه‌و یاسا دگانوه‌پیاداناينه‌ وه‌كورد جوور ده‌وڵه‌ت, هه‌م هاوكاریكردن ڕاسه‌وڕاس هه‌رێم كوردستانه‌ له‌ڕوی وه‌پێداين چه‌ك‌و كه‌ره‌سته‌ێ سه‌ربازی‌, وه‌وه‌يش هه‌رێم كوردستان ‌تويه‌نێ زويتر ئه‌و ناوچه‌يله‌گ له‌لايه‌ن ڕێكخرياگ تيرۆريستی داعشه‌و داگيركريانه‌ ئازاد بكا.

په‌رله‌مانتاره‌یل شیعه‌ێ عێراق ده‌سكردنه‌سه‌ ‌دژایه‌تیكردن ئه‌و یاساێ كۆنگرێسه‌, چه‌ودێره‌يليش ئويشن:”یاساگه‌ێ ئه‌مریكا داناين وه‌ربه‌سێگه‌ ئه‌ڕا هه‌ژموون ئيران له‌عێراق, چوينكه‌ ‌ئيسه‌ ئه‌مریكا تويش ئحراج بويه‌, وه‌خاتر ئه‌وه‌گ به‌ش فره‌ێگ له‌و ناوچه‌يله‌ ك له‌ژێر ده‌س داعش ده‌رهاوريانه‌, وه‌هاوكاری ئيران بويه‌”.

چه‌وه‌ڕێ كريه‌ێد ئاینده‌ێ كورد له‌چوارچێوه‌ێ ئه‌و یاسا, ئاینده‌ێ ڕووشنێگ نه‌ود, چوينكه‌ لایه‌نه‌يل سیاسی و له‌بان گشتيانيش عه‌ره‌به‌يل‌ شیعه‌‌و ئيران, سه‌رسه‌ختانه‌ دژ وه‌ یاساگه‌ێ كۆنگرێسن‌و دژ ئه‌وه‌ن چه‌ك ڕاسه‌وڕاس بدريه‌ێده‌ هێز پێشمه‌رگه‌‌و سوننيه‌يل.

له‌لاێگ تره‌و وه‌رپرسه‌یل ئه‌مریكا‌ وه‌تايبه‌ت‌ (جۆ بایدن) جێگر سه‌رۆك كۆمار ئه‌و وڵاته‌, هاتگه‌سه‌ سه‌ر خه‌ت‌و جه‌خت له‌وه‌ ئه‌كاده‌و ك وڵاته‌گه‌ێ نيه‌وده‌ مه‌مه‌رێگ ئه‌ڕا دابه‌شكردن عێراق, ئيسه‌يش یاساگه‌‌ێ كۆنگرێس ئه‌مریكا چه‌وه‌ڕێ قه‌ڵه‌مه‌گه‌ێ (باراك ئۆباما)ی سه‌رۆك ئه‌مریكا ئه‌كا, تا یاساگه‌ وه‌پێ ئمزا بكا, یا ڕه‌دێ بكاده‌و.

له‌شوون بڕياره‌گه‌ێ كۆنگرێس، (مه‌سعود بارزانی) سه‌رۆك هه‌رێم كوردستان وه‌سه‌ردانێگ فه‌رمی ڕه‌سیه‌ ئه‌مریكا‌و بڕیاره‌ وه‌ل وه‌رپرسه‌یل ئه‌و وڵاته‌، تاوتوێ پڕچه‌ككردن هێزی پێشمه‌رگه‌‌و زیاێكردن هاوكارییه‌یل ئه‌مریكا بكا ئه‌ڕا ملله‌ت كورد له‌باشوور كوردستان، وه‌تایبه‌ت ئيسه‌ هه‌رێم كوردستان وه‌سه‌دان كیلۆمه‌تر دژ وه‌ ڕێكخرياگ تیرۆرستی داعش ها له‌ به‌ره‌ێ جه‌نگ ‌‌و تائيسه‌يش چه‌نه‌ها ناوچه‌ی كوردستانی هانه‌ ده‌س داعش، هاووه‌خت تاوتوێكردن كێشه‌يل ناوبه‌ين هه‌رێم‌و به‌غدا‌و ئاينده‌ێ هه‌رێم كوردستان‌و هه‌نگاوناين وه‌ره‌و سه‌روه‌خۆيی ئابووری یا ده‌وڵه‌تێگ سه‌روه‌خوه‌ێ كوردی، چه‌وه‌ڕێ كريه‌ێد یه‌كێگ تر بوود له‌و ته‌وه‌ره‌يله‌ ك له‌سه‌ردانه‌گه‌ێ بارزانی ئه‌ڕا ئه‌مریكا قسه‌ له‌باره‌يانه‌و‌ بكريه‌ێد.

وه‌باوه‌ڕ چه‌ودێره‌يل، بايه‌سه‌ سه‌ردانه‌گه‌ێ بارزانی ئه‌ڕا ئه‌مریكا، مێژوويگ ئه‌ڕا ملله‌ت كورد تومار بكا، وه‌تایبه‌ت ئه‌ڕا ئاينده‌ێ باشوور كوردستان، ڕه‌زامه‌ندی‌و قه‌وڵێگ له‌ئه‌مریكا وه‌ربگرێ، ك دی‌ كاریگه‌ری ناوخوه‌یی عێراق‌و وڵاته‌یل هاوساو ناوچه‌گه‌، كاریگه‌ری له‌بان هه‌رێم كوردستان نه‌ياشتوون، وه‌و مانا كورد بايه‌سه‌ زه‌مانه‌تێگ له‌و سه‌ردانه‌ ئه‌ڕا ئه‌مریكا مسۆگه‌ر بكا.

ا. ج


Source link

About Hooshyar

Check Also

Kanada Vaksîna Pfizer – BioNTechê bo Zarokên 12-15 Salî Dipejirîne

Kanada destûr da vaksîna vîrusa korona ya Pfizer – BioNTechê ku ew bo zarokên temenên …

Leave a Reply

Your email address will not be published. Required fields are marked *