كۆمارییه‌يل ده‌وڵه‌ت كوردستان ‌كه‌نه‌ بانگه‌شه‌ێ هه‌ڵوژاردن

بڕیاره‌ له‌ مانگ 11ی 2016، ولایه‌ته‌يل یه‌كگرتگ ئه‌مریكا هه‌ڵوژاردن سه‌رۆك ئه‌نجام بيه‌ێد، هه‌ر ئمساڵیش كاندیده‌گان ئه‌ڕا ئه‌و هه‌ڵوژاردنه‌ دیاری ‌كريه‌ن، چه‌ن سناتۆرێگ كۆمارییه‌يلیش ك‌ شانس كاندیدبوين ئه‌ڕا سه‌رۆك ئه‌مریكا دێرن‌، هه‌ر له‌ ئيسه‌وه‌ ده‌س كردنه‌سه‌ بانگه‌شه‌ێ هه‌ڵوژاردن و له‌ناو ئه‌و بانگه‌شه‌يليشه‌ پرس ده‌وڵه‌ت سه‌روه‌خوه‌ێ كوردستان ‌ورووژنن، به‌شێگ له‌ چه‌ودێره‌یل سیاسی هانه‌بان ئه‌و باوه‌ڕه‌ ك ئه‌و بانگه‌شه‌يله‌ ‌بوونه‌ بڵق بان ئاو و بڕێگ تريش هانه‌ بان ئه‌و باوه‌ڕه‌ ك كورد سوود له‌و ده‌رفه‌ته‌يله‌ وه‌ربگرێ و ئاماده‌كاری ئه‌ڕاێ بكه‌ێد.

له‌يباره‌وه‌ سناتۆر ڕاند پۆڵ، كاندید ئه‌ڕا هه‌ڵوژاردن سه‌رۆكایه‌تی 2016ی ئه‌مریكا، وه‌ میدیا ئه‌مریكییه‌گان وتگه‌‌، بايه‌سه‌ وه‌ شێوه‌ێگ ڕاسه‌وخۆ چه‌ك بدريه‌ێده‌ پێشمه‌رگه‌، هاووه‌خت پشتیوانی خوه‌یشێ نيشانداس‌ ئه‌ڕا دروس‌كردنی ده‌وڵه‌تێگ له‌ باشوور (كوردستان).

پۆڵ وتیش: “من زیاتر ‌چمه‌ نوا‌و خه‌ت تازه‌ ئه‌ڕا كوردستان ‌كيشم و قه‌وڵ ده‌وڵه‌ت ده‌مه‌پێيان، كورد بايه‌سه‌ وڵات خوه‌ێ داشتوود ئه‌ڕا به‌ره‌نگاربوينه‌وه‌ێ توندڕه‌وه‌يل”.

وه‌رجله‌يه‌يش سیناتۆر تێد كروز ك یه‌كێگ تره‌‌ له‌ كاندیده‌یل كۆمارییه‌يل ئه‌ڕا ئه‌و هه‌ڵوژاردن ئه‌مریكا، وه‌ هه‌مان شێوه‌ ڕاێ ئه‌و بوی ك راسه‌وخۆ چه‌ك بدريه‌ێده‌ پێشمه‌رگه‌و پشتیوانی خوه‌ێ ئه‌ڕا ملله‌ت كوردستان دووپاته‌و كرد‌.

كروز وتیش: “پێشمه‌رگه‌ جه‌نگاوه‌ره‌يل وه‌هێزێگن له‌ ڕويوه‌ڕويبوينه‌وه‌ێ داعش”.

وه‌ هه‌مان شێوه‌يش سیناتۆر لیندسی گراهام ك‌ یه‌كێگ تره‌ له‌ كاندیده‌یل كۆمارییه‌يل ئه‌ڕا ئه‌و هه‌ڵوژاردنه‌، له‌سه‌ر پرس پڕچه‌ك‌كردن پێشمه‌رگه‌ هابان ئه‌و باوه‌ڕه‌ك ئه‌مریكا و ئه‌وروپا وه‌بێ گله‌وخواردن ئه‌ڕا به‌غدا، چه‌ك بێه‌نه‌ پێشمه‌رگه‌.

سه‌باره‌ت وه‌ی باسه‌، د.نوری تاڵه‌بانی چه‌ودێر سیاسی و شاره‌زاێ سیاسه‌ت ناوده‌وڵه‌تی ئويشێ: “كورد ‌تويه‌نێد سوود له‌و بانگه‌شه‌يله‌ وه‌ربگرێ و گرنگه‌ له‌ ناوخوه‌ێ ئاماده‌كاری ئه‌ڕاێ بكه‌ێد”.

وتیش: “بايه‌سه‌ كورد له‌ ناوخوه‌ێ یه‌كگرتگ و یه‌ك وتار بوود و لۆبیی جه‌هانیی خوه‌ێ وه‌هێزه‌و بكه‌ێد، چوينكه‌ ڕه‌سين وه‌ ماف چاره‌ێ خوه‌ێنويسان حه‌ق گشت نه‌ته‌وه‌ێگه‌‌”.

وه‌ل ئه‌وه‌يشا تاڵه‌بانی گه‌شبین نه‌وی وه‌و بانگه‌شه‌يله‌ و له‌بان ئه‌و باوه‌ڕه‌ بوی ك ئه‌مریكا له‌ی قۆناغه‌ ناخوازێ كورد بووده‌ ده‌وڵه‌ت و كۆمارییه‌يلیش ئه‌ڕا ڕه‌سين وه‌ ده‌سه‌ڵات سه‌رۆك ئه‌و بانگه‌شه‌‌ ‌كه‌ن.

له‌لاێ خوه‌یه‌و‌، سارسام شوانی مامۆستاێ زانكۆ و پسپۆڕ له‌ په‌یوه‌ندییه‌يل ناوده‌وڵه‌تی، هابان ئه‌و باوه‌ڕه‌، ئه‌و بانگه‌شه‌‌ له‌لایه‌ن كۆمارییه‌يله‌و‌ په‌یوه‌ندی وه‌ سه‌ركه‌فتگی دیپلۆماسیه‌ت سه‌ركردایه‌تی كورد و سه‌رۆكایه‌تی هه‌رێمه‌و‌ دێرێ‌، وه‌ختێگ له‌ جه‌نگ دژ وه‌ داعش تويه‌نستن رووژئاوا و ئه‌مریكا بخه‌نه‌ سه‌ر خه‌ت، ئه‌وه‌يش كارێ كردگه‌ ك كۆمارییه‌يل بخوازن سوود له‌و په‌یوه‌ندییه‌ وه‌ربگرن ك‌ فره‌تر راێ گشتی ملله‌ت ئه‌مریكا جويلانگه‌، وه‌تایبه‌تیش پرس پێشمه‌رگه‌ وجه‌نگ وه‌ل داعش، ئه‌و سه‌ركه‌فتن پێشمه‌رگه‌ ئه‌ڕا ملله‌ت ئه‌مریكا، گرنگی فره‌ێگ دێرێ‌ و كاریگه‌ری له‌بان ده‌نگده‌ره‌یل ئه‌مریكی فره‌ێگ نه‌ێد.

له‌لاێ خوه‌یه‌و‌ ئازا حه‌سیب قه‌ره‌داخی چه‌ودێر سیاسی و خاوه‌ن كتاو هه‌ڵوژاردنه‌یل ئه‌مریكا ئاماژه‌ وه‌ ئه‌وه‌ ده‌ێد، كورد بايه‌سه‌ سوود له‌ گشت ده‌رفه‌تێگ وه‌ربگرێ و ته‌قالا بكه‌ێد له‌ هه‌ر شوينێگ ترويسكه‌ێگ ده‌ركه‌فت، كار له‌بانێ بكه‌ێد، وه‌لێ بايه‌سه‌ ئه‌وه‌يش بزانيمن ك ئه‌وه‌ بانگه‌شه‌س و زياتر ئه‌ڕا جه‌مه‌كردن ده‌نگه‌، وت: “نيه‌ود كورد وه‌و خاتره‌ خوه‌ێ بخه‌ێده‌ شان كۆماریه‌يل و گشت خاگانێ بخه‌ێده‌ ناو سه‌وه‌ته‌ێ ئه‌وان‌، بايه‌سه‌ وه‌ گشت شێوه‌ێگ كار ئه‌ڕا ئه‌و پرسه‌يله‌ بكه‌ێد، چ دیمۆكراته‌يل بوون چ كۆمارییه‌يل”.

وه‌ل ئه‌وه‌يشا جه‌خت له‌بان ئه‌وه‌ كرده‌و‌ ك‌ كۆماریه‌يل له‌سه‌ر پرس كورد و جه‌نگ دژ داعش و هاتنه‌ ناو عێراق و رماننێ، جیاوازی فره‌ێگ ‌ وه‌ل دیمۆكراته‌يل داشتنه، ئه‌وه‌يش په‌یوه‌ندی وه‌ سیاسه‌ت ئه‌وانه‌و دێرێ‌ له‌ ده‌یشت ئه‌مریكا، وه‌ل ئه‌وه‌يشا وه‌گوره‌ێ مێژووی سیاسی ئه‌مریكا فره‌ جار‌ كۆمارییه‌يل وه‌ دروشم چشتێگ وتنه‌‌، وه‌لێ دوياخر له‌سه‌ر ده‌س ديمۆكراته‌يل جێوه‌جێ‌كرياس‌، وه‌و خاتره بايه‌سه‌‌ كورد باڵانس خوه‌ێ وه‌ قسه‌ و لێدوان وه‌رجله‌ هه‌ڵوژاردنه‌گان له‌ده‌س نه‌يه‌ێد.

Basnews

ا.ج


Source link

About Hooshyar

Check Also

ژمارەی خوێندکارانی بواری تەندرووستی زیادی کردووە، ١٤٧ هەزار کەس ڤاکسینی کۆرۆنایان وەرگرتووە 19 januari kl 16.32 – Radio Sweden Kurdish – ڕادیۆی سوید – Radyoya Swêdê

دەربارەی Radio Sweden Kurdish – ڕادیۆی سوید – Radyoya Swêdê بەشی کوردیی ڕادیۆی …

Leave a Reply

Your email address will not be published. Required fields are marked *